Covalima, 08 Abríl 2026 – Exelência Prezidente Autoridade Munisípiu Covalima, Sr.Miguel Armada Cardoso, fo sasin ba renúnsia kargu husi Xefe Suku Tashilin, Sr. Jacob Alves TAROMAN, ne’ebé deklara katak, nia labele ona kontinua ninia mandatu nu’udar líder komununitáriu iha suku Tashilin, ho rajaun prinsipál tanba okupadu ho servisu seluk durante ninia mandatu.

Desizaun ne’e foti bazeia ba kumprimentu ba Lei Númeru 9/2016, loron 8 fulan-Jullu (Lei de Sukus), ne’ebé regula kona-ba knaar no substituisaun iha estrutura kbiit nian iha suku.

Tuir artigu sira iha lei ne’e, bainhira xefe suku ida renúnsia an ka labele hala’o tan ninia funsaun, kargu ne’e, sei asumi provizoriamente husi Xefe Aldeia ne’ebé idade boot liu iha suku refere, to’o fali eleisaun foun ka foti desizaun foun husi Konsellu Suku.

Xefe Suku ne’e esplika katak, ninia desizaun ne’e foti ho konsiénsia tomak hodi labele prejudika atendimentu ba povu no dezenvolvimentu iha Suku Tashilin, liu-liu Sr. Jacob Alves TAROMAN, iha fulan Agostu tinan 2025, eleitu ona membru konsellu Kombatente Libertasaun Nasionál Munisípiu Covalima.

Nune’e liu hosi desizaun Konsellu Suku nian, Xefe Aldeia Kuluoan, Afonso S. Martins (Idade Boot) ofisialmente nomeadu hodi asume kargu nu’udar Xefe Suku Tashilin, Xefe Aldeia nomeada fali, Sra.Adelina B. Monis ne’ebé antes ne’e assume kargu hanesan Delegada aldeia Kuluoan.

Iha Prezidente Autoridade Munisípiu Covalima, Sr.Miguel Armada Cardoso ninia intervensaun, agradese ba dedikasaun ne’ebé Xefe Suku sesante fó ona ba povu no Estadu. Iha parte seluk, PAM mós fó hanoin ba atual Xefe Suku, Sr. Afonso S. Martins atu kontinua serbisu ho integridade no kumpri mandatu lei nian hodi serví povu Suku Tashilin, hodi garante katak administrasaun suku nian kontinua la’o ho di’ak. Liu-liu Pas no Estabilidade iha Suku ne’e rasik, no PAM oritenta oinsá kada Sesta tenke halo Limpeza jeral.

Partisipa iha sorumutu nee maka, Sekretariu Munisipal Asuntu Sosial no Organizasaun Sira, Komandante PNTL Postu Zumalai, Asesor PARTISIPA, Asesor Koordenador Munisipiu Covalima, Asesor Legal, Autoridade Postu Administrativo Zumalai, no partisipante sira seluk, enkuantu atividade nee organiza hosi, Servisu Munisipal Organizasaun Naun Governental no Organizasaun Komunitaria.

Média PAM Covalima