Fatumea, 04 Agostu 2025 – Iha kontinuidade preparativu ba prosesu eleisaun iha futuru, ohin loron, STAE (Sekretariadu Tékniku Administrasaun Eleisaun) hamutuk ho CNE (Komisaun Nasional Eleisaun) realiza sosializasaun no resenseamentu eleitoral ba sistema Biometriku iha Postu Administrativu Fatumea.
Atividade ne’e realiza iha sala reuniaun Postu Fatumea, ho partisipasaun ativa husi autoridade lokál no komunidade. Partisipante sira mak inklui:
• Administrador Postu Administrativu Fatumea
• Representante Veteranos/a,
• Sr. Diretor STAE,
• Sr. Diretor CNE,
• Komandante Eskuadra PNTL Postu Fatumea,
• Xefe Seksaun sira,
• Xefe Suku no Xefe Aldeia sira,
• no Membro Konsellu Suku/Aldeia.
Iha total, 30 pesoa partisipa iha atividade importante ida ne’e.
Introdusaun no Mensajen Husi Administrador Postu
Iha abertura, Administrador Postu Administrativu Fatumea fó mensajen abertura no motivasaun ba partisipante sira. Nia sublinhadu importansia sistema Biometriku atu garante dadus eleitoral sira ne’ebé presizu, transparente no seguru. Administrador Postu hateten:
“Ezisténsia dadus eleitoral ne’ebé atual no konfiável importante tebes ba prosesu eleisaun demokrátriku. Sosializasaun hanesan oportunidade atu hatene klaru kona-ba sistema foun Biometriku, no rezolve duvida sira. Hakarak aprezia partisipasaun husi lideransa lokal no komunidade, tanba ita hotu mak responsavel atu bele contribui ba prosesu eleisaun ida ne’ebé livre, justu no inkluzivu.”
Atividade tuir ho apreséntasaun husi STAE no CNE kona-ba implementasaun sistema Biometriku, benefísiu sira, no prosesu rejistu. Iha seguidu, realiza diskusaun interativa ho komunidade atu responde klarifikasaun no preocupasaun sira.

copyright.vocal_point.portal_munisipiu_covalima 2025
image’s :