Autoridade Munisipál Covalima Apoia Peskiza Sientífiku UNDANA Kupang iha Área Fronteira (Tilomar no Fatumea)

Covalima, 19 Maiu 2026 – Ekipa husi Universidade Nusa Cendana (UNDANA) Kupang, hala’o sorumutu ho Prezidende Autoridade Munisípiu Covalima, Sr. Miguel Armada Cardoso, ne’ebé akompana mós husi Sekretáriu Munisipál Administrasaun Finansas, Sr. Alberto Moniz de Araújo. Sorumutu ne’e ho objetivu atu hato’o planu peskiza nian ne’ebé sei realiza iha Postu Administrativu Tilomar no Fatumea.

Iha sorumutu ne’e, ekipa husi Universidade Undana Kupang esplika katak peskiza ne’e sei foka liubá kondisaun biofíziku, sosioekonomia, no kultura komunidade nian iha área fronteira, liuliu iha basia idrográfika ka Daerah Aliran Sungai (DAS). Peskiza ne’e mós sei foti amostra kona-ba bee-rai no seguransa ai-han (food security). Atividade ne’ebé sei envolve mak hanesan observasaun direta iha terrenu, entrevista ho komunidade lokál, no rekolha amostra husi aspetu ambientál no sosiál sira.

Prezidende Autoridade Munisípiu Covalima, Sr. Miguel Armada Cardoso, simu di’ak tebes inisiativa ne’e no hateten katak Autoridade Munisipál prontu atu fó apoiu tomak durante atividade peskiza ne’e la’o, hodi garante pas no estabilidade. Nia hein katak rezultadu husi peskiza ne’e bele sai baze ida hodi hadi’a kondisaun ekonomia, sosiál, no prezervasaun kultura komunidade nian iha Tilomar no Fatumea, laran mós bele hametin liután relasaun di’ak entre Timor-Leste no Indonézia.