MALAKA, 30 Outubru 2026 — Autoridade Munisipál Covalima, liuhusi Prezidente Autoridade Munisípiu (PAM) Covalima, Sr. Miguel Armada Cardoso, LIC. ECo akompaña husi Sekretáriu Munisipál ba Asuntu Sosiál, Sr. Filomeno Cardoso, hamutuk ho komitiva, partisipa iha selebrasaun Misa ikus no prosesaun boot ba Inan Maria Na’in Feto Malaka, iha Rejiaun Malaka, Indonézia.
Selebrasaun relijioza ne’e hahú ho prosesaun (perarakan) boot hodi lori Estátua Na’in Feto husi Igreja Parókia Santa Maria Imaculada Betun to’o iha Gruta de Lourdes Tubaki. Durante prosesaun ne’e, PAM Covalima hamutuk ho komitiva no sarani sira husi Suai la’o hamutuk ho sarani lokál sira hodi hatudu sira-nia devosaun no fiar metin ba Inan Maria, molok kontinua ho selebrasaun Misa Eukaristia iha área Gruta nian.
Além de partisipa iha prosesaun, komitiva no sarani sira husi Suai mós envolve-an diretamente hodi hananu hamutuk iha kantu komuniaun nian durante selebrasaun Eukaristia no prosesaun ne’e la’o.
Selebrasaun tinan ne’e lori tema: “Malaka dalam Pelukan Ina Maria Nain Feto Malaka 1958–2026: Perarakan Positif, Perarakan Sukses”. Partisipasaun komunidade husi Timor-Leste iha eventu ne’e hatudu la’ós de’it lasu espirituál, maibé sai mós hanesan momentu importante hodi hametin fraternidade, solidariedade, no relasaun amizade entre povu iha área fronteira rua (Timor-Leste no Indonézia).
Iha oportunidade ne’e, Prezidente Autoridade Munisípiu Covalima, Sr. Miguel Armada Cardoso, haktuir katak vizita no partisipasaun ida-ne’e sai nu’udar ponte importante hodi hametin liután lasu sosiál, kulturál, no espirituál entre Munisípiu Covalima no Rejiaun Malaka.
Partisipa mós iha delegasaun Autoridade Covalima nian mak hanesan:
- Segundu Komandante PNTL Munisípiu Covalima, Superintendente Asistente Polísia Patrício de Jesus ho nia ekipa;
- Xefe Gabinete PAM no Asesór Gabinete PAM sira;
- Diretór Servisu Munisipál sira;
- Administradór/Autoridade Postu Administrativu Zumalai;
- Diretór UNPAZ Klasse Normál Covalima;
- Ekipa Koru no funsionáriu sira husi Gabinete PAM Covalima.
Fontes: Média PAM Covalima & Média Portal Munisipál Munisípiu Covalima