Tilomar, 11 Agostu 2026 — Equipa Asesór Prinsipál husi Ministério Administrasaun Estatal (MAE) realiza atividade monitorizasaun “in-loco” iha Postu Administrativu Tilomar, Munisípiu Covalima. Atividade monitorizasaun ne’e ho objetivu atu hare ho besik/direta implementasaun servisu no dezenvolvimentu iha terrenu.
Enkontru no monitorizasaun ne’e hetan partisipasaun masimu husi Xefe Seksaun na’in haat (4), Xefe Suku na’in haat (4) hamutuk ho sira-nia Membru Konsellu Suku, no mós funsionáriu hotu husi Postu Administrativu Tilomar. Tuir ajenda no planu ne’ebé mehi no hatur tiha ona, atividade monitorizasaun ne’e sei kontinua mós ba Suku rua (2), mak hanesan Suku Maudemo no Suku Lalawa/Cassabauc.
Iha biban vizita ne’e, Administradór Postu Administrativu Tilomar Sr. Venancio Sarmentu Lic.Ed aprezenta no rekomenda diretamente ba Equipa Asesór Prinsipál MAE atu fó atensaun ba kondisaun edifísiu Postu Administrativu Tilomar nian. Iha nia intervensaun, nia salienta katak uma laran husi edifísiu ne’e agora daudaun iha kondisaun aat no presiza reabilitasaun urjente, tanba estrutura fiziku ne’e harii kedas husi tempu administrasaun Indonézia nian no nunka hetan hadi’a ne’ebé kle’an.
Exelentisímu Administradór Postu Tilomar, Venancio Sarmentu Lic.Ed mós hato’o apelu forte ida ba Xefe Suku no Konsellu Suku sira hotu atu hahú halo mudansa iha mentalidade servisu. Nia enfatiza importánsia husi pontualidade, profesionalismu, no kolaborasaun servisu ne’ebé diak hodi prepara an simu Desentralizasaun no Poder Lokál.
“Ita presiza servisu hamutuk ho unidade ne’ebé aas, hatudu pontualidade no profesionalizmu, no respeita konsiderasaun ba malu hodi nune’e ita bele atinje objetivu no metas ne’ebé hatur ba futuru munisípiu no nasionál,” tenik Administradór Postu Tilomar.
Atividade ne’e la’o ho susesu no demonstrasaun kompromisu boot husi líder komunitáriu no funsionáriu sira hotu atu kontinua hakat ba oin ho servisu publiku ne’ebé kualidade no transparenteku.
Pontu Fokal Portal Munisipal Munisipiu Covalima