Covalima, 27 Jullu 2026, Komandante Komandu Polísia Nasionál Timor-Leste (PNTL), Superintendente Xefe Polísia Paulino Carmo Pereira, hamutuk ho Segundo Komandante PNTL Munisípiu Covalima, Superintendente Asistente Polísia Patrício de Jesus, hala’o mediasaun entre komunidade, União Agrikultura Covalima (UNARCO) no Prezidente Autoridade Munisípiu Covalima, relasiona ho desentendimentu ne’ebé akontese iha loron 24 Jullu 2026, iha Aldeia Lo’okeu Foho.

Mediasaun ne’e hala’o ho objetivu atu buka solusaun dame no hametin fila-fali relasaun di’ak entre Autoridade Munisípiu no komunidade ne’ebé envolve iha diskusaun ne’e. Durante enkontru ne’e, parte hotu-hotu hatudu kompromisu atu hakotu situasaun ne’ebé mosu ona no prevene atu akontesimentu hanesan ne’e labele repete iha futuru.

Hosi parte Prezidente Autoridade Munisípiu Covalima, Sr. Miguel Armada Cardoso, nia hato’o perdaun ba komunidade ho espírito lideransa ida ne’ebé valoriza dame, unidade no harmonia ba povu tomak iha munisípiu.

Enkuantu hosi parte komunidade, sira mós hato’o deskulpa ba Prezidente Autoridade Munisípiu Covalima kona-ba akontesimentu ne’ebé mosu. Komunidade afirma katak iha tempu badak sei organiza konferénsia imprensa hodi ofisialmente hato’o deskulpa ba públiku no esplika ho klaru kona-ba situasaun ne’ebé akontese.

Liu hosi mediasaun ne’e, espera katak relasaun entre Autoridade Munisípiu, komunidade no entidade relevante sira bele sai di’ak liután, hodi hametin dame, unidade no kooperasaun ba dezenvolvimentu Munisípiu Covalima.

(Média PAM Covalima