COVALIMA, 06 Outubru 2026 — Iha ámbitu selebrasaun Dia Nasionál ba Feto Timor oan, Prezidente Autoridade Munisípiu Covalima, Sr. Miguel Armada Cardoso, abertura ofisialmente no lidera sesaun solene ba aprezentasaun dokumentáriu sira ho títulu “Mátria” no “Perfil do Arquivo e Museu da Resistência Timorense (AMRT)”.

Atividade ne’e hala’o iha Salaun CAFE Suai ho objetivu atu fó koñesimentu klean ba estudante sira, liuliu ba foin-sa’e sira, kona-ba papél fundamentál no kontribuisaun eróiku feto Timor   oan sira nian iha tempu luta ba ukun rasik-an, hamutuk ho importánsia konservasaun istória nasionál ne’ebé rai hela iha AMRT.

Iha nia diskursu abertura, Prezidente Autoridade Munisípiu Covalima hateten katak dokumentáriu “Mátria” la’ós de’it mós filme ka dezenu ida, maibé nu’udar ‘dokumentu moris’ ida ne’ebé fó sasin ba aten-barani, dedikasaun, no sakrifísiu feto sira nian.

“Sira la’ós de’it feto iha kotuk, maibé nu’udar pilár fundamentál ne’ebé sustenta rezisténsia to’o lori Timor-Leste ba ninia independénsia,” afirma Sr. Miguel Armada Cardoso.

Alende ne’e, liu husi aprezentasaun “Perfil do Arquivo e Museu da Resistência Timorense (AMRT)”, Autoridade Munisipál husu nafatin importánsia ba preservasaun memória koletiva nasionál, hodi nune’e jerasaun foun bele banati-tuir valór sira ne’ebé funu-na’in sira husik hela.

Iha biban ne’e, Prezidente Autoridade mós hato’o felisitasaun: “Parabéns ba Feto Timoroan hotu.”

Sesaun solene ne’e hetan partisipasaun masimu husi Komandu PNTL Munisípiu Covalima, Asesór, Gabinete, Xefe Departamentu Edukasaun Munisipál, reprezentante Museu da Resistência Timorense, Asosiasaun Feto, no konvidadu sira seluk.





Pontu Fokal Portal Munisipal


© 2026 Autoridade Munisipal Covalima