Covalima, 11 Novembru 2026 — Munisipál Covalima liu husi Diresaun Servisu Munisipál Obras Públikas (SMOP) daudaun ne’e na’in ba ezekusaun projetu konstrusaun Fatin Estasionamentu Públiku iha Suku Debos, Postu Administrativu Suai, Munisípiu Covalima, ne’ebé hetan ona progresu fisiku to’o pursentu 52,3%.
Projetu ne’e finansia husi alokasaun orsamentu Bens e Serviços ho montante totál $42.884,35. Obra ne’e hahú ezekuta husi loron 05 Setembru 2026 no prevee sei konklui no entrega ba públiku iha loron 05 Dezembru 2026.
Ezekusaun iha terenu entrega kompletu ba kompañia União Suai Dame, ne’ebé lidera husi Sr. Agostu Hendrique hanesan Diretór Ezekutivu.
Iha entrevista ho Xefe Departamentu Gestão Ekipamentus Colectivos, Sr. Rui Lopes, Lic. Tec, nia esplika katak projetu ne’e la’o tuir padraun tékniku no hetan Supervizaun rigoroza.
“Projetu konstrusaun estasionamentu públiku ne’e hetan responsabilidade máximu husi enjeñeiru tékniku SMOP na’in rua no apoiu husi traballadór na’in 10 hodi garante kualidade no tempo ne’ebé determinadu,” dehan Sr. Rui Lopes Lic. Tec.
Konstruksaun fatin estasionamentu públiku ne’e halo atu fasilita movimentu veíkolu sira iha sidade laran, organiza espásu públiku sira ho di’ak liu tan, no fó seguransa ho konfortu ba komunidade no motorista sira iha Munisípiu Covalima, liu-liu iha Suku Debos no Suai laran tomak.
Pontu Fokal Portal Munisipal Munisipiu Covalima