Ha’u-nia lia-menon ba oan-kiak na’in-haat iha Covalima: “IMI SEI LA MESAK”
Covalima, 28 Abríl 2026
Ha’u-nia fuan todan tebes bainhira ha’u to’o iha Suku Matai.
Ha’u mai ne’e la’ós de’it nu’udar Prezidente, maibé nu’udar aman no maun ida ne’ebé hakarak hako’ak no rona imi-nia lian-tanis. Inundasaun iha Sábadu liubá lori tiha buat barak, inklui inan-aman ne’ebé sira hadomi. Maibé ha’u mai atu hateten: imi sei la la’o mesak iha nakukun laran.
Bainhira ha’u hasoru foin-sa’e na’in-haat ne’e, ha’u sente sira-nia laran-kanek ne’ebé kle’an. Tan ne’e, ha’u promete ona ba sira no ba família tomak katak, iha fulan rua nia laran, uma foun ida sei hari’i hodi sira bele iha fatin seguru hodi hela ba.
Ha’u mós sei la husik sira lakon esperansa ba futuru, ha’u sei buka dalan atu apoia sira-nia estudu no ajuda oan-feto dahuluk atu hetan serbisu, nune’e nia bele sai ai-hun ne’ebé hamriik metin hodi tau matan ba nia alin sira.
Ha’u rona istória kona-ba Saudozu Alcino da Costa Afonso no Mariana dos Santos. Sira na’in-rua mak ezemplu husi ema Timór ne’ebé badinas, moris simples hodi servisu rai no hakiak animál ho domin.
Trajédia ne’e akontese tanba de’it sira hakarak hatudu sira-nia domin ba família, hodi fila husi toos ba vila. Maski sira luta maka’as hasoru bee-boot ne’ebé mai derrepente, natureza iha planu seluk. Maski sira husik hela ita, sira-nia domin ba oan sira mak sei sai naroman ba ita hotu atu ajuda oan kiak sira ne’e.
Ha’u foti kompromisu: nu’udar Xefe Estadu, ha’u sei asegura katak esperansa foun sei moris fali iha fatin ne’ebé agora nakonu ho matan-been.
Pontu Vokal Portal Munisipal Munisipiu Covalima:
- Marcos Gusmão, Lic.Eco, M.Gest