PAM Covalima Simu Vijita Kortezia husi Provedór Direitus Umanus no Justisa (PDHJ)

Covalima, 24 Juñu 2025

Prezidente Autoridade Munisípiu Covalima (PAM), Sr. Miguel Armada Cardoso, simu vizita kortezia husi Provedór Direitus Umanus no Justisa (PDHJ), Sr. Virgílio da Silva Guterres “Lamukan”, ho ekipa, iha Palásiu Administrativu Munisípiu Covalima.

Iha enkontru-ne’e, Provedór PDHJ fó informasaun kona-ba planu atu destaka Pontu Fokál husi PDHJ na’in rua, atu presta apoiu ba Administrasaun Munisípiu Covalima, iha tempu badak mai. Inisiativa ne’e mak parte husi esforsu atu fortifika kolaborasaun interinstitusionál no promove defendimentu direitus umanus iha nivel lokal.

Tanba preocupasaun kona-ba seguransa komunidade sira ne’ebé movimenta iha área auto-estrada, PDHJ fó klarifikasaun kona-ba informasaun sira ne’ebé espalla iha média sosiál no keixa-keixa ne’ebé fó hanoin inseguransa, ho referénsia ba asaun ema deskoñesidu sira ne’ebé suspeitu halo tuda no kesi tali iha estrada. Provedór husu ba PAM no autoridade sira relevante atu kontinua koordenasaun estreitu hodi responde ba situasaun sira ida-ne’e.

Iha biban vizita-ne’e, PDHJ entrega Livru Relatóriu Monitorizasaun ba PAM, ho kontéudu relasiona ho observasaun violasaun direitus umanus iha Timor-Leste, hanesan parte husi transparencia no partilha informasaun.

PAM, Sr. Miguel Armada Cardoso, fó agradecimento boot ba Provedór PDHJ no nia ekipa, tan ba inisiativa atu hatama Pontu Fokál iha Covalima, ho objetivu atu fortalece presensa PDHJ no fo asisténsia diretamente ba komunidade. Prezidente sublinha mos importánsia kolaborasaun ne’e atu facilita prosesu keixa iha kazu violasaun direitus umanus, liu-liu ba grupu vulnerável.

PAM fó bemvindu ba ekipa ne’ebé sei servisu iha Covalima, ho esperansa katak sira sei mostra profisionalizmu no imparsiálidade iha implementasaun mandatu PDHJ, nune’e bele kontribui atu reduz diskriminasaun no garantisa proteção ba direitus umanus iha rai laran.

Relasiona ho movimentasaun iha auto-estrada, PAM kontinua koordena ho PNTL no autoridade lokál atu monitoriza situasaun no hato’o medidu seriu ba pesoal sira ne’ebé halo hahalok ilegál. Husu ba populasaun atu kontinua kolabora ho autoridade sira hodi manten seguranza publika no sosiedade ne’ebé harmonioza.

(Média PAM Covalima) Editing by Official Vocal Point Portal Munisipal – Covalima