COVALIMA, Segunda-feira, 18 de Agostu 2025 – Vise-Ministru Administrasaun Estatál, Sua Ex. Sr. Jacinto Rigoberto Gomes de Deus, hamutuk ho Presidente Autoridade Munisípiu Covalima, Miguel Armada Cardoso, ofisialmente prezide serimónia Tomada de Posse no Juramentu Ajente Administrasaun Públika Foun na’in-49, iha Salaun Munisípiu Covalima.
Iha diskursu ofisiál, Vise-Ministru MAE hato’o agradesimentu ba Maromak tanba oportunidade atu halibur hamutuk iha momentu solenidade ida ne’e, no rekoñese Ajente foun na’in-49, Cidadáu Covalima, ne’ebé pasa ho susesu iha prosesu selesaun bazeia ba méritu, no agora hetan fiar atu halo servisu iha administrasaun públika.
“Juramentu solene ida-ne’e marka imi-nia kompromisu atu serbí nu’udar Ajente Administrasaun Públika ho lealdade, dedikasaun no integridade. Ita-boot sira prova ona imi-nia kapasidade liuhosi méritu, no ohin ita hahú imi-nia kna’ar nu’udar reprezentante di’ak Covalima nian, komprometidu atu serbí Estadu, Governu no povu,” subliña Vise-Ministru.
Vise-Ministru hatutan tan katak Covalima, hanesan munisípiu sira seluk, kontinua prepara ba dezenvolvimentu iha futuru, liu-liu liuhosi:
- haforsa kapasidade institusionál (Servisu Munisipais 19, Eleisaun PAM ka Kámara Munisipál no Membru Asembleia Munisipál),
- gestaun administrativa no públika,
- fortalisaun lojístika no kapasidade umanu,
atu sustenta dezenvolvimentu desentralizasaun no estabelese podér lokál ne’ebé adapta ba realidade, kultura no nesesidade komunidade Timor nian.
Durante aktu solene, Ajente Administrasaun Públika foun sira jura atu tane aas Konstituisaun RDTL, obedese lei no regulamentu sira vigór, no hala’o funsaun públika ho responsabilidade, imparsialidade no kompromisu ba interese jeral.
Vise-Ministru fó mos hanoin ba ajente foun kona-ba importánsia atu kaer metin Kódigu Étika Funsaun Públika, ne’ebé ezije funsionáriu públiku sira atu tau interesse Estadu no povu aas liu kualkér interesse pesoál ka grupál.
Iha nia mensajen finál, Vise-Ministru hato’o parabéns ba ajente foun sira no enkoraja sira atu kontinua servisu ho fiar, disipliña no determinasaun:
“Parabéns ba ita-nia Ajente Administrasaun Públika foun na’in-49! Mai ita hotu la’o hamutuk ho fiar, disipliña, determinasaun no kompromisu metin atu hametin governasaun lokál no lori dezenvolvimentu ba ita-nia sidadaun sira.”
Serimónia solenidade ida ne’e hetan partisipasaun husi Komisáriu Funsaun Públika, Diretor Nasionál MAE, Xefe Departamentu, Diretores Servisu Munisipál, Amu Paróku, konvidadu dignu, funsionáriu no família ajente foun sira.
copyright://vical_point@municipio_covalimaportal_municipal Mídia Autoridade Munisípiu Covalima)
