Covalima, 13 Agostu 2026 — Administrador Postu Administrativu Tilomar, Sr. Venancio Sarmento, L.Ed, foin lalais ne’e akompanya reprezentante husi Embaixada Uniaun Europeia iha Suku Lalawa, hodi realiza vizita ba grupu koperativa sira ne’ebé estabelese ho apoiu husi parseiru World Vision Timor-Leste (WVTL).
Iha biban ne’e, Administrador Postu Tilomar ho mehi boot apoiu dezenvolvimentu komunidade nian, fó hanoin ba membru grupu koperativa sira atu nafatin hamutuk no hamoris unidade iha grupu laran. “Unidade no matenek mak sai na’in ba dezenvolvimentu ne’ebé mehi ba iha futuru,” nia husu.
Iha okaziaun ne’e mos, Sr. Venancio Sarmento hato’o agradesimentu kle’an no rekoñesimentu ba Embaixada Uniaun Europeia no WVTL. Liu husi parseiria ne’ebé la’o ao longo tinan tolu (3) nia laran, parseiru sira konseke capacita no haburas kbiit komunidade nian iha setor oioin, inklui sistema Rai no Empresta Osan (VSLA) hortikultura, no empreendedorizmu ki’ik.
Resultadu husi kapasitasaun ne’e hatudu progresu ne’ebé pozitivu tebes, no membru sira husi grupu hirak ne’e hatudu ona kompreensaun ne’ebé kle’an no domina ho di’ak atividade no matenek hotu ne’ebé sira simu. Autoridade lokal mos afirma sira-nia kompromisu atu nafatin prontu fó apoiu ba parseiru dezenvolvimentu sira hotu ne’ebé mai ho intensaun di’ak hodi foti sa’e moris komunidade nian.
Aleinde ne’e, autoridade no delegasaun Embaixada Uniaun Europeia simu oportunidade hodi hare’e direta atividade grupu produsaun Tahu lokal nian. Grupu ne’e mak sai fornesedór prinsipal ne’ebé sustenta Programa Merenda Eskolar iha Eskola Basika Central (EBC) Fohobua no Eskola Basika Filial (EBF) Tilomar, inklui fornese produtu ba elementu Falintil-FDTL ne’ebé destaca iha Postu Tilomar.
Iniciativa sira ne’e sai hanesan pontu vitoria ida iha kria servisu no hafórsa ekonomia lokal iha Munisípiu Covalima.
Pontu Fokal Portal Munisipal Munisipiu Covalima