𝐋𝐨𝐫𝐨𝐧 𝐭𝐞𝐫𝐬𝐚 𝟐 𝐅𝐮𝐥𝐚𝐧 𝐉𝐮ñ𝐮 𝟐𝟎𝟐𝟔, 𝐒𝐞𝐤𝐫𝐞𝐭𝐚𝐫𝐢𝐮 𝐀𝐬𝐮𝐧𝐭𝐮 𝐒𝐨𝐬𝐢𝐚𝐥 𝐧𝐨 𝐎𝐫𝐠𝐚𝐧𝐢𝐳𝐚𝐬𝐚𝐮𝐧 𝐊𝐨𝐦𝐮𝐧𝐢𝐭𝐚𝐫𝐢𝐚 𝐇𝐚𝐥𝐚𝐨 𝐀𝐛𝐞𝐫𝐭𝐮𝐫𝐚 𝐛𝐚 𝐀𝐭𝐢𝐯𝐢𝐝𝐚𝐝𝐞 𝐒𝐞𝐧𝐬𝐢𝐛𝐢𝐥𝐢𝐳𝐚𝐬𝐚𝐮𝐧 𝐊𝐨𝐧𝐚-𝐛𝐚 𝐈𝐦𝐩𝐨𝐫𝐭𝐚𝐧𝐬𝐢𝐚 𝐒𝐚𝐥𝐯𝐚 𝐆𝐮𝐚𝐫𝐝𝐚 𝐏𝐚𝐭𝐫𝐢𝐦ó𝐧𝐢𝐨 𝐊𝐮𝐥𝐭𝐮𝐫𝐚𝐥, 𝐧𝐞’𝐞𝐛𝐞 𝐨𝐫𝐠𝐚𝐧𝐢𝐳𝐚 𝐡𝐨𝐬𝐢 𝐃𝐢𝐫𝐞𝐬𝐚𝐮𝐧 𝐍𝐚𝐬𝐢𝐨𝐧𝐚𝐥 𝐏𝐚𝐭𝐫𝐢𝐦ó𝐧𝐢𝐨 𝐊𝐮𝐥𝐭𝐮𝐫𝐚𝐥 (𝐃𝐍𝐏𝐊) 𝐚𝐭𝐢𝐯𝐢𝐝𝐚𝐝𝐞𝐬 𝐝𝐞𝐬𝐞𝐦𝐢𝐧𝐚𝐬𝐚𝐮𝐧 𝐧𝐞’𝐞 𝐫𝐞𝐚𝐥𝐢𝐳𝐚 𝐢𝐡𝐚 𝐌𝐮𝐧𝐢𝐬𝐢𝐩𝐢𝐮 𝐂𝐨𝐯𝐚𝐥𝐢𝐦𝐚.
Iha fatin hanesan Sekretariu Asuntu Sosial no Organizasaun Komunitaria ho haksolok hodi partisipa iha atividade sensibilizasaun ida ne’e atu ko’alia kona-ba importánsia salvaguarda patrimóniu kulturál. Patrimóniu kulturál mak riqueza no identidade povu iha Rai ida ne’e nian, ne’ebé inklui lisan, kostumi, língua, arte tradisionál, monumentu istóriku no valor sira seluk ne’ebé husi ita nia beiala sira husik hela iha ita nia rain.
Salvaguarda patrimóniu kulturál importante tebes tanba ajuda rai metin ita nia identidade nasionál, transmite koñesimentu ba jerasaun foun sira, no promove respeitu ba diversidade kulturál. Karik la iha esforsu atu proteje no preserva patrimóniu hirak ne’e, ita bele lakon parte importante husi ita nia istória no kultura.
Tan ne’e, responsabilidade atu salvaguarda patrimóniu kulturál la’ós de’it Governu ka instituisaun sira nian, maibé responsabilidade hamutuk husi komunidade tomak. Liuhosi edukasaun, dokumentasaun, konservasaun no partisipasaun ativu husi juventude sira, ita bele garante katak patrimóniu kulturál sei hela moris ba jerasaun agora no futuru.
Tamba ne’e iha loron ida ne’e, ita halibur malu atu hala’o sensibilizasaun kona-ba importánsia salvaguarda patrimóniu kulturál. Atividade ida ne’e ninia objetivu mak hodi hasa’e konsiénsia komunidade, estudante sira, kona ba valor no importánsia patrimóniu kulturál hanesan parte husi ita nia identidade no istória.
Nu’udar Autoridade Munisípio Covalima ita hein katak liuhosi atividade ida ne’e, partisipante sira bele komprende di’ak liu tan kona-ba oinsá atu proteje, preserva no valoriza patrimóniu kulturál iha ambiente família, eskola no komunidade.
Mídia Secam-Asoc
Pontu Vokal Portal Munisipal Munisipiu Covalima:
- Marcos Gusmão, Lic.Eco, M.Gest