Serimónia entrega kargu (Handover) husi Xefe Serbisu Lokál Komunitáriu Sesante ba Xefe Serbisu foun iha Salaun Postu Administrativu Tilomar la’o ho susesu.
Iha biban ne’e, Xefe Serbisu Sesante kompromete an katak sei kontinua halo koordenasaun no apoiu Xefe foun, liuliu bainhira eziste preokupasion ka dezafiu ruma kona-ba dadus demográfiku no uza-rai/topográfiku (ornografia). Nia hateten katak kargu ne’e provizóriu de’it no pertense ba komunidade, nune’e iha tempu ruma sei entrega fali ba ema seluk. Atividade ne’e mós akompaña husi funsionáriu Postu Tilomar hotu, hodi sai nu’udar ezemplu di’ak no referénsia ba servisu-fatin iha futuru.
Iha fatin hanesan, Xefe Serbisu foun konfirma katak nia prontu atu kontinua programa sira ne’ebé implementa ona husi Xefe Sesante iha tinan rua liubá. Ba oin, nia sei hamosu planu foun hodi kobre Suku 4 no Aldeia 23 liuhusi sorumutu tuir oráriu ne’ebé planeadu ona.
Administradór Postu Administrativu (APA) fó apresiasaun boot ba enkontru ne’e. Maske iha mudansa ba lideransa, maibé nu’udar intelektuál Tilomar oan, sira hatudu fuan-boot hodi hakoak no kadi laran ba malu, ho vizaun de’it ida: hamutuk hodi lori Postu Tilomar ba oin ho di’ak liután.
Pontu Vokal Portal Munisipal Munisipiu Covalima:
- Marcos Gusmão, Lic.Eco, M.Gest