TILOMAR, 28 Maiu 2026 Autoridade Transitória Munisípiu Administrador Postu Administrativu Tilomar hala’o observasaun ba projétu konstrusaun kampu multi-funsaun ba joven sira iha Aldeia Faularan, Suku Maudemo, Postu Administrativu Tilomar. Kampu ne’ebé sei uza ba modalidade dezafiu desportivu hanesan Voleibol, Futsal, no Baskatbol ne’e, iha ninia naruk metru 40 no luan metru 28. Obra ne’e rasik ezekuta husi kompañia Sabudoi Unipessoal Lda.
Joven sira iha Postu Administrativu Tilomar sinte kontente tebes, tanba liutiha tinan barak ne’ebé sira hasoru difikuldade no halerik ba fatin dezafiu desportivu, agora liusi prezensa IX Governu Konstitusionál, mehi ne’e bele realiza ona. Kampu oin tolu (3) ne’e sei fó oportunidade ba joven sira hodi hala’o kompetisaun no kria jogu sira iha loron-boot sira iha futuru.
Hanesan Administrador Postu Administrativu Tilomar, mós fó apresiasaun boot no agradese tebes ba Ministru Dezenvolvimentu Rurál (MDR) ne’ebé konsidera ona pedidu husi Administrador hodi realiza preokupasaun no nesesidade joven sira-nian.
“Ami nafatin husu tulun ba MZDAK atu bele konstrui kampu futeból ida iha Postu Administrativu Tilomar, tanba kbiit no interese husi maioria foin-sa’e no komunidade sira-nia ba desportu futeból ne’e boot tebes.
Tanba Postu Tilomar nudar área fronteira, se wainhira realiza tan kampionatu ‘Fronteira Cup’, ami presiza tebes kampu ida ne’ebé di’ak, luan, no kumpri estandarte internasionál. Iha tinan kotuk, ami realiza ona ‘Fronteira Cup’ ne’ebé lori hamutuk munisípiu tolu, mak hanesan: Oecusse, Bobonaro, no Covalima. Maibé, foin-sa’e sira tenke joga de’it iha kampu ne’ebé ho kondisaun tahu no ladún di’ak. Tan ne’e, ami husu tebes parseria no apoiu ida-ne’e.”
Pontu Vokal Portal Munisipal Munisipiu Covalima:
- Marcos Gusmão, Lic.Eco, M.Gest