“Komemora Loron Mundiál ba Tasi, Komunidade Suku Maudemo Postu Administativu Tilomar, Munisipiu Covalima ho Parseiru Institusionál Halo Limpeza Jerál”

Maudemo, 5 de Junhu 2026 – Hodi komemora Loron Mundiál ba Tasi nebe monu iha ohin, loron 5 de Junhu, Exmo. Administrador Postu Administrativu Tilomar Sr. Venacio Sarmento organiza atividade Limpeza Jerál iha tasi-ninin nebe nudar fatin turizmu iha Suku Maudemo, Postu Administrativu Tilomar Munisípiu Covalima.

Atividade ida-nee susesu tebes tamba hetan partisipasaun masimu husi Partisipante sira hamutuk ema 150. Partisipante sira nee mai husi Estudante no Profesores husi ESGP Paralelu Salele, Profesores husi EBC Salele, Funsionáriu Postu Administrativu Tilomar, Funsionáriu husi Delegasaun Territoriál Saúde nian, Polísia (PNTL), Xefe Suku ho Konsellu Suku Maudemo, Xefe Aldeia sira, inklui mós komunidade lokál.

Tasi nudar natureza nebe importante tebes ba moris tamba fó rekursu barak hanesan ikan, lenuk, lafaek, kadiuk, no seluk tan. Tanba nee, liuliu husi atividade ida-nee, husu ba komunidade hotu atu hasees an husi hahalok soe foer arbiru iha tasi-ninin. Ita presiza hamutuk tau matan hodi nune’e bele mantein nafatin tasi nia furak no dezenvolve fatin turizmu nebe iha ona.

Atividade limpeza nee la’o ho susesu no remata ho snack hamutuk. Snack sira-nee mai husi inisiativa funsionáriu hotu, xefe suku, no xefe aldeia sira ne’ebé prepara no lori mai husi idak-idak nia uma, hodi hatudu fali espíritu solidariedade no unidade nian.