Iha nia intervensaun, Sr. Alipio Magno subliña importánsia husi servisu ne’ebé efisiente, transparente, no responsavel hodi responde ho lalais ba nesesidade komunidade nian. Nia reza duni katak funsionáriu públiku sira tenke hatudu ezemplu di’ak iha sira-nia kbiit servisu loroloron nian, tanba sira mak reprezentante Estadu no Governu ne’ebé besik liu no servisu subliña diretamente ho povu.
Relasiona ho dezenvolvimentu infraestrutura teknolójia informasaun nian, Administradór Postu hato’o katak kona-ba ekipamentu rede Starlink ne’ebé halo ona instalasaun iha kada Sede Suku, se karik hasoru fali failha ruma ka dezafiu tékniku, bele hato’o kedas ba Unidade IT Postu Administrativu Zumalai hodi halo manutensaun ho lalais. Medida ida-ne’e foti ho objetivu atu hametin no aumenta asesu internet nian, hodi fasilita mós prosesu servisu administrativu, komunikasaun, no jestaun informasaun governamentál iha kualidade di’ak liután.
Iha parte seluk, Sr. Alipio Magno fó orientasaun ríton ba funsionáriu Apoiu Suku sira atu aumenta liután sentidu responsabilidade no kompromisu ba sira-nia knaar. Nia enfatiza katak funsionáriu Apoiu Suku sira iha papél ne’ebé estratéjiku tebes, tanba sira mak sai pontu ligasaun ka odamatan prinsipál entre Governu no komunidade iha nívell baze (suku). Tan ne’e, husu tebes atu halo servisu ho seriedade, pontualidade, no dedikasaun tomak hodi garante katak informasaun no atividade governamentál hotu bele to’o no la’o ho di’ak.
Alen de ne’e, Administradór Postu mós husu nafatin ba funsionáriu Apoiu Suku hotu-hotu atu halo atualizasaun dadus suku nian bazeia ba kada trimestre (fulan tolu) tuir orientasaun husi Governu Sentrál. Dadus ne’ebé atuál, loloos, no kredível sei sai hanesan baze fundamental ba planeamentu programa dezenvolvimentu, distribuisaun apoiu sosiál, no foti desizaun sira ne’ebé mós bazeia ba realidade no lala’ok loos komunidade nian iha kada suku.
Preokupasaun boot seluk mak kona-ba situasaun inundasaun ne’ebé afeta hela família balu iha área balun iha Postu Zumalai. Kona-ba ne’e, Administradór husu kedas ba Autoridade Lokál no funsionáriu relevante sira atu tun ba terenu hodi halo levantamentu dadus ho lalais no hato’o relatóriu kompleta kona-ba númeru populasaun no família sira ne’ebé afetada. Dadus emerjénsia ne’e urjente tebes atu Governu bele prepara apoiu humanitária no resposta kórreta tuir nesesidade reál sira ne’ebé iha.
Ikusmai, Sr. Alipio Magno fó hanoin hikas ba funsionáriu públiku hotu-hotu kona-ba disiplina oras, atu tama servisu tuir oras ofisiál, no kumpre regra disiplinár hotu ne’ebé vigor. Nia hateten katak disiplina iha fatin servisu la’ós de’it obrigasaun legál ida, maibé mós hanesan fali reflekshun husi responsabilidade moral no respeitu boot ba povu ne’ebé hodi loron-loron hein kualidade servisu públiku ne’ebé di’ak no lalais.
Serimónia Içar Bandeira ne’e remata ho ksolok no esperansa boot katak funsionáriu públiku hotu, liuliu funsionáriu Apoiu Suku sira, bele kontinua hametin kooperasaun, espíritu servisu ekipa, no integridade hodi kontribui hamutuk ba dezenvolvimentu no bem-estar komunidade tomak iha Postu Administrativu Zumalai.
“Servisu ho responsabilidade, disiplina, no integridade mak dalan uniku atu hatán ba konfiansa povu nian no dezenvolve ita-nia rain iha dalan ne’ebé sustentável.”
