𝗖𝗼𝘃𝗮𝗹𝗶𝗺𝗮, 𝟮𝟴 𝗝𝗮𝗻𝗲𝗶𝗿𝘂 𝟮𝟬𝟮𝟲, Ekipa Avaliasaun Kondisaun Minima hosi Ministériu Administrasaun Estatál (MAE) ne’ebé dirije hosi Diretora Geral Toponomia Organizasaun Urbana (DG -TOU), Sra. Maria Odete R. Florindo, aprezenta Rezultadu Relatóriu Avaliasaun Kondisaun Minima (AKM) ba Autoridade Munisípal Covalima ne’ebé maka molok ne’e hala’o ona iha munisípiu Covalima.

Diretora Geral Toponomia Organizasaun Urbana, Sra. Maria Odete R. Florindo relata, aprezentasaun rezultadu Relatóriu AKM ne’e bazeia ba orientasaun hosi Sua Exelénsia Ministru Administrasaun Estatál, ne’ebé maka molok ne’e hala’o ona iha Covalima, hafoin ratama aprezenta rezultadu AKM, ekipa avaliador kontinua prosesa avaliasaun.

Hafoin ramata iha sesaun aprezentasaun nian, ekipa Avaliasaun Kondisaun Minima, entrega livru relatóriu Avaliasaun Kondisaun Minima ba Prezidente Autoridade Munisipíu Covalima, no ekipamentu dijitál hanesan Tablet unidade tolu (3), unidade ida entrega ba Diretóra Servisu Munisipál ONG, no unidade rua entrega ba Pontu Fokal Portal Munisipál, ho objetivu atu apoiu servisu tékniku no jestaun informasaun ba dadus Munisipál.

Enkuantu, avaliasaun ne’e sei hala’o durante loron tolu nia laran hahú hosi loron 28 to’o 30 fulan Janeiru tinan 2026, hafoin ramata Ekipa Avaliador sei prepara relatóriu hosi atividade sira ne’ebé maka realiza ona nune’e sei submete fila-fali ba S.E Ministru Administrasaun Estatal.

Entertantu, atividade ne’e hetan partisipasaun maximu hosi, Prezidente Autoridade Munisipál Covalima,Sr.Miguel Armada Cardoso, hamutuk ho Sekretariu Munisipál Administrasaun Finansas, Sr.Alberto Moniz de Araújo, Sekretariu Munisipál Asuntu Sosial no Organizasaun Komunitaria, Sr.Filomeno Cardoso, Asesor Partisipa, Sr. Ergilio F. Visente ho Diretores Servisu Munisipais, Xefe Departamentus, Autoridade Postu Administrativu 7, Xefe Suku sira, iha salaun Administrasaun Covalima.

(𝑴𝒆́𝒅𝒊𝒂 𝑷𝑨𝑴 𝑪𝒐𝒗𝒂𝒍𝒊𝒎𝒂).