Covalima, Segunda-feira, 12 Janeiru 2026, Lansamentu No Inagurasaun Edifisíu MCI (Ministério Comérçio e Idustria) iha Munisípiu Covalima, lokaliza iha Aldeia Tabacolot, Suku Debos, Postu Administrativo Suai, Munisípiu Covalima. Iha momentu brillante ida ne’e preside mos husi saseluk  Excelensia Prezidente Autoridade Munisípiu Covalima Sr. Alberto Moniz de Araújo, Reprezenta Comandante PNTL Munisípiu Covalima, Dirétor Servisu Munisípal sira, Dirétor Kompaña ba obra konstrusaun Edifísiu MCI, Xefe Departamentu no Funsionáriu Públiku sira.

Diskursu husi Dirétora MCI Munisípiu Covalima.

Ministériu Komérsiu no Indústria (MCI) mak hanesan instituisaun governu Timor-Leste ne’ebé responsabiliza ba dezenvolvimentu ekonómiku liu husi kbi’it komersiál no industriál. Agradese ba Aman Maromak tamba liu husi Nai ninia grasa bele hamriik hamutuk iha ne’e, halo lansamentu no inagurasaun ba edifísiu foun Ministériu komérsiu no indústria sai istóriku mai Povu hotu iha Munisípiu Covalima. Edifísiu ne’e la’os de’it uma foun ida, maibé ne’e mak ‘Uma Boot’ signifika hanesan odamatan foun ne’ebé nakloke ba progresu no prosperidade ba ita-nia negosiante, emprezáriu lokál, no ba dezenvolvimentu indústria sira hotu iha teritoriu Munisípiu Covalima tomak. Ho prezensa husi edifísiu ida ne’e, MCI promete atu fó servisu ne’ebé di’ak liután, besik liután, no lalais liután ba povu Covalima.” “Iha oportunidade ne’ebé kmanek ida ne’e, husi fuan ne’ebé kbiit, hau hato’o agradesimentu boot no apresiasaun ne’ebé aas ba IX Governu Konstitusionál, liu-liu ba Sua Excelensia Ministru Komérsiu no Indústria.

Ho vizaun no polítika IX Governu nian ne’ebé foka ba dezenvolvimentu iha baze, ohin ita bele goza rezultadu ho prezensa edifísiu foun ida ne’e. Konstrusaun ne’e mak prova konkreta husi Governu katak hakarak duni hakbesik an ba povu no hamenus birokrasia ne’ebé naruk.

Ho fasilidade edifisíu foun ida ne’e, ami iha kbiit boot liután atu:

Hamoris fali espíritu emprezariál iha ita-nia munisípiu hodi hametin ekonomia familiár.

Fó atendimentu ne’ebé lalais ba ita-nia povu no negosiante sira iha Covalima.

Fasilita prosesu sira ne’ebé uluk karik susar, sai fali simples no efisiente.

Diskursu husi Reprezentante Excelentísmu Prezindente Autoridade Munisipiu Covalima (Sr. Alberto Moniz de Araújo). 

Okaziaun  ida ne’e sai pasu foun ida ba dezenvolvimentu ekonómiku iha ita-nia Munisípiu Covalima. Ha’u mai iha ne’e hodi reprezenta Prezidente Autoridade Munisípiu ne’ebé labele prezente tamba iha atividade seluk, maibé nia hato’o kumprimentu no apresiasaun boot ba ita hotu. Inagurasaun edifísiu foun Ministériu Komérsiu no Indústria (MCI) iha Covalima mak evidénsia katak Governu Sentrál iha vontade boot atu besik liután servisu públiku ba povu, liu-liu ba ita-nia maluk negosiante no emprezáriu lokál sira. Ho prezensa edifísiu ida ne’e, ita hein katak prosesu birokrasia, dokumentasaun ba lisensa komersiál, no asisténsia ba indústria ki’ik no natoon iha Covalima bele la’o ho lalais, efisiente, no transparente liután. Autoridade Munisipál Covalima prontu atu koopera servisu hamutuk ho MCI hodi dudu kresimentu ekonómiku, nune’e ita-nia produtu lokál sira bele hetan valór ne’ebé di’ak no asesu ba merkadu ne’ebé luan liután.

Iha biban ne’e mos hakarak rekomenda ba funsionáriu sira ne’ebé hala’o knar no responsablidade iha edifísiu foun ne’e, ho Autoridade nia naran husu atu ho fuan ne’ebé protidaun no onestu hodi serbí ita-nia negosiante, emprezáriu lokál, no ba dezenvolvimentu indústria sira. Iha oportunidade ida ne’e, Saseluk husi PAM Covalima mos Akresenta tan, Edifísiu ne’e ita Covalima hotu ninian, tan ne’e Covalima oan tomak, mai ita hamutuk tau matan hodi utiliza ba tempu naruk.

Ho lia fuan sira ne’e, hodi reprezenta Prezidente Autoridade Munisípiu Covalima, ha’u deklara Inagurasaun no Lansamentu ba Edifísiu Ministériu Komérsiu no Indústria  iha Munisípiu Covalima.

Obrigado barak ba ita hotu nia atensaun.

Coppyright husi portal Munisípiu  Covalima