Sekretáriu Administrasaún Finansas, Alberto Moniz de Araújo, akompaña hosi Segundu Komandante PNTL Munisípu Covalima Superintendente Assistente Polícia, Delfin da Silva, prezide serimónia Isár Bandeira Nasionál iha semana dahuluk fulan Fevereiru tinan 2026.

Sekretáriu Administrasaún Finansas, Alberto Moniz de Araújo hato’o ninia diskursu ”  ba funsionariu sira tenke presta ita bo’ot sira nia Disiplina, Lealidade, Obedese no mos iha vestuariu. Iha lei Funsaun Publiku koalia mo-mos ona, funsionariu nia papel atu oinsa bele loron bo’ot ida primeira semana hanesan ne’e, tenke hatais roupa ne’ebé di’ak no liu-liu labele uza oklu metan, sé bainhira hasa’e hela bandeira oklu metan hasai tia lai, atu nune’e presta ita ninia omenazen ba simbolu Nasional ida ne’e, sé lae ita naran arbitu de’it.

Segundu hakarak atu informa ba ita bo’ot sira katak iha Covalima liu-liu iha postu Suai moras Malaria Dengue sa’e maka’as to’o ona 28 kazu,  tamba ne’e mak husu ba parte hotu-hotu toma responsabilidade, ida-idak tenke hamos ninia edifisiu oin para bele mos nafatin atu nune’e evita moras Malaria Dengue.

Ida seluk tan mak hakarak atu informa ba ita bo’ot sira iha fulan ida ne’e Sua Excelencia Primeiro Ministru sei vizita Munisípiu Covalima, ninia data seidauk hatene maibe iha fulan fevereiru laran, tamba ne’e mak husu ba hotu-hotu atu servisu hamutuk fó liman ba malu hodi nune’e prezensa Sua Excelensia ida ne’e bele lori rezulatdu ne’ebé mak di’ak, ligadu ho Avaliasaun Kondisaun Minimu sira ne’e, ita Covalima kategoria BOM la’os MUITO BOM tamba ne’e, diresaun hotu-hotu servisu hamutuk fó liman ba malu.

Ida seluk tan mak husi Diresaun Munisipal Tranporte no Komunikasaun  Covalima iha teste ba Karta Kondusaun, tamba ne’e mak ba hirak ne’ebe lori motor ho kareta seidauk iha karta kondusaun, bele hasai atestadu mediku, priense formatu hodi tuir teste, kada diresaun bele halo rekomendasaun ba sira nia funsionariu sira, hodi bele tuir teste ba karta kondusaun.

Ikus liu atu fó  hatene ba   Komunidade, Kargu Xefia no Funsiunariu sira hotu,   ita nia Klima iha RDTL espesial Munisípiu Covalima ne’e extreme liu,  tamba ne’e mak husu ba hotu-hotu la’os alerta mais fó hanoin de’it ba ita bo’ot sira atu kuidadu a’an, liu-liu ba aihun bo’ot sira ne’e, karik imi halo viagem ka para imi nia motor ruma kuidadu, dalaruma iha udan no anin bo’ot mai bele halo ai tohar hodi bele estraga imi nia motorizada sira.

Ha’u senti ida ne’e mak hato’o iha biban ida ne’e, ba hotu-hotu ninia atensaun no kolaborasaun hato’o obrigadu barak.

Serimónia isar bandeira ne’e hala’o iha, resintu Autoridade Munisípiu Covalima, ne’ebé partisipa hosi Comando Munisípiu Covalima, Diretores/as Servisu Munisipais, Diretores/as   Delegasaun Teritoriál, Xefe Departemntu, Eis Diretor Servisu Munisipal sira, Eis Xefe Departamentu sira, APA Sesante inklui Funsionariu hotu-hotu.

Coppyright hosi Portal Munisipal Covalima “iLquero”