Covalima, 17 Juñu 2025 – Ministériu Administrasaun Estatál (MAE), liu husi Inspetór Jerál, hamutuk ho ekipa ténika, hala’o pre-avalia saun ba Prezidente Autoridade Munisípiu Covalima, Sekretáriu tolu, Diretores Munisípal sira hotu, no Autoridade Postu Administrativu hitu. Avaliasaun ne’e inklui prienxe kestionáriu no realiza intervista direta, iha kontestu preparasaun ba implementasaun Desentralizasaun no Poder Lokal iha Munisípiu Covalima. Atividade ne’e hala’o iha salaun Autoridade Munisípiu Covalima (AMC).

Hafoin konklui prosesu intervista no validasaun kestionáriu, ekipa MAE kontínua ho vizita direta ba Diresaun Servisu Munisípal sira, inklui Sekretáriu no Diretor relevante, atu observa direitamente kondisaun no realidád iha kada eskritóriu, hodi konfirmadu resposta sira ne’ebé fó iha formuláriu.

Iha loron sira oin, ekipa MAE sei kontinua ho monitorizasaun ba implementasaun Projetu Programa Nasionál Dezenvolvimentu Suku (PNDS) no Planu Dezenvolvimentu Integradu Munisipál (PDIM) iha Munisípiu Covalima.

Iha área Edukasaun, sei halo monitorizasaun ba progresu implementasaun obra Ensinu Pré-eskolar, Ensinu Báziku, no programa Merenda Eskolár.

Iha área Agrikultura, sei hare’e ba progresu projetu Irigasaun no Servisu Agríkola.

Iha área Obras Públikas, sei fó atensaun ba konstrusaun Estrada Rural.

Iha área Saúde, sei observa kondisaun Sentru Saúde.

Iha setór Bee no Saneamentu, monitoriza fasilidade bee no saneamentu, no kondisaun edifísiu Postu Administrativu no Sede Suku.

Atividade ne’e objetiva atu hadia preparasaun Munisípiu Covalima ba prosesu desentralizasaun no fó asesu klaru ba servisu publiku ba komunidade.

 

(Fonte: Média PAM Covalima)

Editing by Vocal Point Portal Municipal Munisipiu Covalima