---

Diskursu Solene Hasá’e Bandeira

Covalima, 01 Juñu 2026 – Autoridade Munisípiu Covalima liu hosi Sekretariu Munisipál Asuntu Sosiál no Organizasaun Sira, Sr. Filomeno Cardoso, prezide serimónia Isár Bandeira Nasionál iha semana dahuluk fulan Juñu tinan 2026.

Bandeira Nasionál mak símbolu soberania, ukun-an, no luta naruk ne’ebé ita-nia herói no mártir sira halo ona hodi asu-wa’in atu hetan independénsia. Bainhira ita haree bandeira ne’e sa’e aas ba lalehan, ita tenke hanoin fila-fali responsabilidade boot ne’ebé ita ida-idak kaer hanesan servidór públiku. Tan ne’e, ita tenke hala’o servisu ho onestidade, disiplina, transparénsia, no dedikasaun tomak.

Tama ona ba fulan-Juñu, ha’u hakarak konvida ita hotu atu kontinua hametin espíritu servisu ne’ebé di’ak. Mai ita promove kooperasaun di’ak entre departamentu sira, hodi fó atendimentu ne’ebé lalais, efisiente, no ho kualidade aas ba komunidade sira iha Munisípiu Covalima. Povu hakarak administrasaun ida-ne’ebé bele rona, atende, no responde ba sira-nia nesesidade ho laran-metin no responsabilidade.

Ita mós presiza kontinua hametin kultura disiplina iha fatin servisu: respeita oras servisu, kuida patrimóniu Estadu, no promove ambiente servisu ne’ebé armoniózu no produtivu. Dezenvolvimentu munisípiu nian sei la’o ho susesu bainhira ita hotu servisu hamutuk ho objetivu ida de’it, mak: hadi’a moris povu Covalima nian no kontribui ba dezenvolvimentu nasionál.

Iha okaziazun solene ida-ne’e, ha’u hato’o apresiasaun ne’ebé kle’an ba funsionáriu no ajente sira hotu ne’ebé, durante fulan hirak liubá, hatudu ona dedikasaun no servisu maka’as hodi hala’o programa Governu nian iha munisípiu ida-ne’e. Ha’u husu ba ita hotu atu kontinua aumenta produtividade no profesionalizmu iha servisu loroloron.

Ikusmai, mai ita hamutuk fortalese unidade, solidariedade, no sentimentu patriotizmu atu hala’o knaar ho di’ak liu tan ba povu no Nasaun. Ho laran-ksolas, ha’u hakotu ha’u-nia liafuan iha ne’e. Maromak fó bensaun ba ita hotu, ba Munisípiu Covalima, no ba Repúblika Demokrátika Timor-Leste.

Viva Covalima! Viva Timor-Leste! Obrigadu barak.

---

---

Copia hosi Mídia Secam-Asoc

Pontu Vokal Portal Munisipal Munisipiu Covalima:

1. Marcos Gusmão, Lic.Eco, M.Gest

---