COVALIMA, 24 Jullu 2026 – Administrador Postu Administrativu Tilomar, Sr. Venancio Sarmento, L.Ed, hamutuk ho ekipa husi Centru Joventude Covalima (CJC) realiza sorumutu importante ida kona-ba atividade Tara Bandu iha Postu Administrativu Tilomar.
Enkontru ida ne’e hetan partisipasaun masimu husi Reprezentante Komandante Esquadra PNTL Tilomar, Xefe Suku no Konsellu Suku husi Suku hat (4) mak hanesan: Lalawa, Beiseuc, Maudemo, no Casabauc.
Iha biban ne’e, Administrador Postu Tilomar ho Diretor CJC hala’o mós enkontru ho “Makaer Fukun” / Lia-Na’in uma lisan lulik sira (na’in 10 husi kada suku). Sorumutu ne’e mós halibur lideransa husi Grupu Arte Marsiál no Rituál sira, hanesan PSHT, Padjadjaran, IKS, KORKA, Kung Fu Master, 77, Suku Sagrada Família, Santo António, no Doze-Doze (12.12).
Objetivu ko’alia no diskute iha enkontru ne’e mak atu implementa regulamentu Tara Bandu iha suku 4 ne’ebé eziste iha Postu Tilomar. Pontu mahuluk no importánsia husi Tara Bandu ne’e abranje área tolu (3):
- Ema ho Ema: Promove paz, hodi hametin dame no relasaun di’ak iha komunidade nia laran.
- Ema ho Natureza: Proteje meiu-ambiente, floresta, no bee-matan sira.
- Ema ho Animál: Kuida no regula moduk/mahi ba animál sira.
Paz no orden ne’e hametin liuhusi dezisaun husi Lia-Na’in no Sadan-Na’in sira. Iha futuru, komunidade hotu iha Postu Tilomar tenke kumpri régras no lei nune’e Bainhira ema ruma kontra, la fiar parte husi lisan nian, nia sei hasoru konsekuénsia husi Natureza no Matebian sira.
Atividade ne’e mós hetan apoiu ho partisipasaun husi Veteranu sira, Funsionáriu Floresta, Agrikultura, Xefe Suku, no funsionáriu postu nian hotu.
Atu hametin liután reforsu regulamentu ne’e, iha serimónia realizasaun Tara Bandu aban-bairua, sei konvida mós Administrador husi Postu Administrativu Fatumea, Fohorem, Maucatar, no Suai. Convite ne’e ho razaun tanba postu sira ne’e baliza ho Tilomar, atu nune’e sira-nia komunidade mós hatene no la tama-sai ka estraga natureza ho arbiru iha área Tilomar nian.
Pontu Vokal Portal Munisipal Munisipiu Covalima