COVALIMA, 07 Agostu 2026 – Administrador Postu Administrativu Tilomar, Sr. Venancio Sarmento, hamutuk ho Komandante Polísia Munisípiu Covalima, Diretór Agrikultura Munisípiu, Reprezentante husi Sekretária Estadu Komunikasaun Sosiál (SECOMS), no Parseiru Internasionál sira hanesan Organizasaun Ai-han no Agrikultura (FAO) no World Vision Timor-Leste (WVTL), hala’o lansamentu kuda Hare Mean iha área hektares rua (2) iha Aldeia Coloama, Suku Casabauk, Postu Administrativu Tilomar.
Lansamentu ne’e konta ho partisipasaun masimu husi Xefe Suku sira, lider komunitáriu, no komunidade lokál sira.
Iha biban ne’e, Administrador Postu Tilomar, Sr. Venancio Sarmento, hato’o alerta no apelu ba komunidade iha Aldeia Coloama atu kontinua husik sira-nia ain-fatin iha natar, maibé nafatin uza rai sira ne’e ba produsaun agríkola. Nia deklara katak iha Postu Tilomar, natar barak mak abandonadu tanba problema susar bee, maibé nia hato’o agradesimentu boot ba komunidade iha Suku Casabauk no Suku Lalawa tanba sei mantein badinas halo natar.
Alem de ne’e, Administrador ne’e husu rigorozamente ba komunidade sira atu labele fa’an rai arbiru, tanba área hirak ne’e iha poténsia boot no kualidade as ba sektór agrikultura, liuliu ba kultivasaun hare.
Liu husi lansamentu ne’e, Administrador Postu hamutuk ho Diretór Agrikultura no Parseiru Internasionál sira halo mós observasaun direta ba área natar sira seluk ne’ebé komunidade sira prepara hela. Sira verifika katak iha hektares ualu (8) tan mak dadauk ne’e prontu atu kuda hare iha tempu badak.
Komunidade Husu Fasilidade Ekipamentu Modérnu
Iha ne’ebá, komunidade sira hato’o sira-nia lamentasaun no husu tulun ba Governu atu fasilita ekipamentu agríkola modérnu sira, hanesan Hand-tractor no makina batidor (rontok) hare. Sira haktuir katak duranti ne’e sira sei uza metódu tradisionál—uza karau atu sama rai—ou tenke aluga ema seluk nian ekipamentu, ne’ebé ho kustu as.
Atu hatán ba kestaun ne’e, Autoridade Postu kompromete atu hatutan lian no halerik komunidade nian ba Governu Sentrál. Sira salienta katak Tilomar iha rai natar ne’ebé luan no ho poténsia boot, maibé dezafiu boot liu mak falta kbiit no material sira atu makina rai no kolleita produtu ho efisiénte.
Pontu Fokal Portal Munisipal Munisipiu Covalima