Covalima, 16/06/2025, Ministériu Administrasaun Estatál (MAE) reprezenta husi Inspetór Jerál MAE, Elvino Bonaparte do Rego, hamutuk ho Prezidente Autoridade Munisípiu Covalima (PAM) Sr.Miguel Armada Cardoso, abertura Programa Asisténsia Tékniku Hodi Mellora Prestasaun Servisu iha Administrasaun Lokál, ne’ebé hala’o iha Salaun Administrasaun Munisipál Covalima.

Iha intervensaun, Inspetór Jerál hato’o, objetivu prinsipál husi atividade ne’e, oinsá atu halo atendimentu ne’ebé besik liu ba komunidade liu husi dekretu lei nú 84/2023 ne’ebé hatuur ona kona-ba ida-idak nia kompeténsia ne’ebé atu jere iha Servisu Munisipál. Hafoin abertura, sei iha aprezentasaun matéria husi oradór sira oinsá atu fó hanoin filafali saida maka ita halo ona iha tinan 2024, ho nune’e husi Ministériu Sentrál koko hamutuk ho Autoridade Munisipál oinsá tama lalais ba iha podér lokál hodi atende Komunidade sira.

Oinsá atu tulun ita hala’o servisu ne’e hamutuk ba oin maka, Covalima oan tenke unidade, ida ne’e sai save prinsipál, ita hotu hamutuk maka bele hadi’a munisípiu ne’e, tenke rona orientasaun husi Koordenadór Prinsipál iha Munisípiu hanesan Prezidente Autoridade Munisípiu, hodi bele prienxe atu hakarak ba Podér Lokál.

Tuir ajenda, loron dahuluk, ekipa halo aprezentasaun hodi introdús matéria no fó informasaun sira ne’ebé liga ho delegasaun servisu ka kompeténsia ne’ebé mak, atribui ona ba iha Munisípiu sira, inklui distribui Kestionáriu ba PAM ho Diretrores Servisu Munisípais hotu.

Loron daruak, sei halo pre-avaliasaun kondisaun Mínimu ba Prezidente Autoridade Munisípiu Covalima no Diretroes Munisipál hotu liu husi Resposta kestionáriu ne’ebé fahe ona iha loron dahuluk.

Loron Datoluk, ekipa sei halo monitorizasaun ba Projetu Programa Nasionál Dezenvolvimentu Suku (PNDS) no Planu Dezenvolvimentu Integradu Munisipal (PDIM) iha Munisipiu Covalima, iha área Edukasaun sei hare’e progresu implementasaun obra Ensinu Pre-eskolar, Ensinu baziku no implementasaun Merenda Eskolar; iha área Agrikultura hare’e liu kona-ba Irigasaun no Servisu Agríkola iha Munisipiu Covalima; área Obras Publika sei hare’e kona-ba konstrusaun ba Estrada Rural; área Saúde hare’e liu ba kondisaun Sentru Saúde, sei monitoriza mós atividade iha Setor Be’e no Saneamentu inklui Kondisaun Edifisiu Postu Admnistrativu no Sede Suku iha Munisipiu Covalima.

 

(Média PAM Covalima).

Editing by Vocal Point Portal Municipal Munisipiu Covalima

&