Covalima, 12 Dezembru 2025 (Tatoli) – Servisu Munisípal Asaun Sosiál (SMAS) iha sexta-feira ne’e fó apoiu finanseiru ho montante US$ 1.600,00 ba feto vulneravél na’in-ualu husi Postu Administrativu Zumalai no Postu Administrativu Suai, iha Munisípiu Covalima.
Diretór SMAS, Clementino Bere, hateten katak molok halo intrega apoiu osan ba benefisiáriu sira, funsionáriu SMAS hala’o ona asesmentu dadus hodi avalia kondisaun sosial no ekonomia feto vulneravél sira. Tuir rezultadu asesmentu ne’e, SMAS disidi fó apoiu finanseiru ho montante US$ 200,00 ba kada benefisiária ida.
“SMAS fó apoiu osan ho objetivu atu ajuda feto vulneravél sira hodi responde ba nesesidade uma laran, maibé mos atu haforsa sira nia independénsia ekonomika. Ami hein osan ne’e bele uza ba sosa material eskola ba oan sira ka hodi halo negósiu ki’ik, nune’e bele garante sustentabilidade ba família,” hateten Diretór SMAS.
Atividade intrega apoiu finanseiru ne’e realiza iha postu administrativu rua, mak Postu Administrativu Suai (Suku Beco) ho benefisiáriu na’in-rua, no Postu Administrativu Zumalai ho benefisiáriu na’in-neen.
Dirijente SMAS mos fó orientasaun ba benefisiáriu sira atu uza osan ho kuidadu no responsavel, ba nesesidade família, no labele uza ba joga ka atividade kultura ne’ebé la prioridade.
Iha mesma oportunidade, Reprezentante Administradór Postu Administrativu Zumalai, Fernando Magno, reforsa katak feto vulneravél sira ne’ebé simu apoiu osan ne’e identifika hosi xefe suku sira, tanba sira nia kondisaun sosial-ekonómika merese atu hetan apoiu finanseiru.
“Autoridade Postu apoia programa SMAS hodi hakbi’it ita nia inan feton sira ne’ebé laiha kapasidade ekonomika atu sustenta família. Ami apela ba benefisiáriu sira atu uza osan ne’e ba nesesidade loron-loron nian no hodi haforsa sira nia moris,” hateten Fernando Magno.
Husi parte benefisiáriu, feto vulneravél husi Postu Administrativu Zumalai, Veronica Mesquita, espresa nia kontentamentu tanba simu apoiu finanseiru hosi SMAS, ne’ebé bele ajuda nia atu hala’o negósiu ki’ik.
“Ha’u kontente tebés tanba hetan apoiu osan ida ne’e. Durante tempu ne’e ha’u hasoru difikuldade osan, maibé agora ha’u iha planu atu sosa terigu hodi fa’an dosi no rai osan hodi selu oan nia eskola,” hateten Veronica Mesquita ho agradesementu.
