Iha loron 17 fulan Jullu tinan 2025, Secretário Municipal dos Assuntos Sociais e as Organizações halo abertura ba enkontru kona-ba Programa Kuidadu Saúde Primária, ne’ebé realiza iha Munisípiu Covalima. Enkontru ida ne’e hetan partisipasaun husi Xefe SSK, Reprezentante EPS, no Inspetor Eskola husi Postu Administrativu hitu (7) iha Munisípiu Covalima.

Objetivu prinsipal husi enkontru ne’e hanesan:

Hadia kompreensaun komunidade kona-ba importancia edukasaun no saúde, liu-liu programa saúde primária;

Mobiliza estudante sira hodi aproxima-an ba fasilidade saúde iha comunidade;

Implementa kontinuamente programa SN5S inklui kuidadu saúde primária no hadia asesu ba servisu saúde ba labarik sira iha Eskola;

Halo advokasia atu fortifika ligasaun entre komunidade no sistema saúde hodi sustenta implementasaun servisu saúde ne’ebé apropriadu no sustentável.

Haktuir objetivu sira ne’e, Secretário Municipal dos Assuntos Sociais e as Organizações (Sr. Filomeno Cardoso, Lic.Eco., M.M) fó agradecimento ba Ministério Saúde, liu husi parseiru no ekipa Servisu Saúde Munisípiu Covalima, tan ba kontinuidade programa ida ne’e iha komunidade, liu-liu ba labarik no juventude sira ne’ebé eskola iha nível Pré-eskolár no Ensinu Báziku iha Munisípiu Covalima.

Ko’alia kona-ba saúde nu’udar parte importante iha ita moris lor-loron, programa saúde primária fo asesu ba imunizasaun, nutrisaun, prevensaun moras, no kuidadu ba labarik sira. Programa SN5S bele fó kontribuisaun ba moris saudável ba labarik sira iha eskola, no bele aumenta konsientizasaun komunidade kona-ba saúde públika.

Mensajen Secretário Municipal dos Assuntos Sociais e as Organizações

Hau, nu’udar Sekretáriu Asuntu Sosiál no representante Organizasaun Komunitáriu, hakarak hato’o mensajen agradesimentu no motivasaun ba ita hotu, liu-liu ba partisipante sira iha enkontru importante ida ne’e kona-ba Programa Kuidadu Saúde Primária iha Munisípiu Covalima.

Saúde primária nu’udar base fundamentál ba dezenvolvimentu komunidade. Programa ne’e sei ajuda ita atu kompriende liu tan importância edukasaun no asesu ba servisu saúde, mobiliza estudante sira ba fasilidade saúde, promove nutrisaun no imunizasaun ba labarik sira, no reforsa relasaun entre komunidade no sistema saúde hodi fó garantia servisu saúde ne’ebé apropriadu no sustentável.

Ami agradese barak ba Ministério Saúde, no ekipa Servisu Saúde Munisípiu Covalima, tan ba apoio no kolaborasaun atu programa ida ne’e bele kontinua iha komunidade, liu-liu ba labarik no juventude sira ne’ebé hela iha Eskola nível Pré-eskolár no Ensinu Báziku.

Hau fiar katak, ho partisipasaun ativa husi ita hotu, programa ne’e sei iha impaktu boot ba komunidade. Halo liman hamutuk, atu bele garante moris saudável, edukadu no pleno ba gerasaun foun iha Covalima.

Obrigadu barak. Viva Saúde Primária! Viva komunidade Covalima!

Media: Secam-Asoc
Editing by : copyright.Vocal-Point Municipal Covalima
Image’s