Covalima, 24 Maiu 2026- Autoridade Munisípiu Covalima liu hosi Prezidente Autoridade Munisipíu Covalima, Sr. Miguel Armada Cardoso hamutuk ho ekipa, tun direita ba terenu hodi observa no halo levantamentu dadus ba komunidade sira, ne’ebé afetadu hosi inundasaun, kauza udan boot ne’ebé akontese durante semana tolu tuir malu.

Hanesan iha Postu Suai Suku Beko, Postu Zumalai Suku Tashilin, Postu Tilomar Aldeia Tabolo, hafoin identifika, ekipa direita foti dadus hodi relata ba governu sentrál, atu hetan apoia imediata no foti medida.

Ekipa identifika katak, inundasaun akontese kauza hosi, bee le’ut kloot iha área Auto-estrada nian, ho nune’e halo udan been la suli liu ba Tasi, ne’e duni bee sa’e fali hodi fó difikuldade no estraga komunidade sira-nia uma no sasán sira hotu.

Iha intervista, Prezidente Autoridade Munisípiu Covalima, informa, bee dalan iha parte auto-estrada nian kloot liu, tanba uza de’it anilla, ho ida ne’e bee labele sai liu, rai henek, fatuk ai rohan sira nakonu, bee fila fali ba komunidade nia leet.

“Tanba ida ne’e ami koko hanoin hela Auto-estrada iha área Beco nian, presiza ko’a halo fila fali ponte, hodi nune’e bele normaliza bee dalan, liu ba Tasi, se lae kada tinan ita labele rezolve inundasaun,”

Nune’e maka apela ba komunidade tomak iha Covalima tantu mai hosi lider komunitária, autoridade lokál, ba partidu polítiku sira, ba iha igreja no sosiedade tomak, bazeia ba Sirkulasaun ne’ebé hasai ona, atu tau matan, presiza ita hotu nia konsiénsia, atu labele baka (tua/tali) sira, komunidade sira labele halo toos iha mota ninin, liuliu proibida konstrui uma iha mota ninin.

PORTAL & MEDIA PAM