COVALIMA, 17 Novembru 2026 – Autoridade Munisipál, Administradór Postu Administrativu, no Xefe Suku sira iha Postu Administrativu Fohoren, Munisípiu Covalima, hala’o enkontru koordenasaun ida iha loron Tersa ne’e (17/11/2026), hodi aselera prosesu reseansiamentu eleitorál no tratamentu dokumentu sidadania hanesan Billete Identidade (BI) no Sertidaun RDTL.

Inisiativa ida-ne’e hala’o nu’udar parte importante ida husi preparasaun másima atu hasoru festa demokrasia Eleisaun Jerál tinan 2027 nian.

Durante enkontru ne’e, autoridade lokál sira ko’alia kle’an kona-ba estratéjia no mekanizmu servisu hamutuk nian, hodi asegura katak sidadaun hotu ne’ebé prienxe ona kritériu iha baze bele hetan asesu fásil no lalais hodi atualiza sira-nia kartaun eleitorál no dokumentu sira seluk.

Autoridade sira mós subliña importánsia husi papél Xefe Suku no Xefe Aldeia sira-nian atu mobiliza no fó informasaun ne’ebé loos ba komunidade iha baze, atu nune’e sidadaun hotu bele partisipa ativu iha prosesu reseansiamentu no la lakon sira-nia direitu votu iha eleisaun tinan oin.

Enkontru koordenasaun ne’e la’o ho di’ak no hetan kompromisu maka’as husi parte hotu atu kontinua hametin komunikasaun hodi susesu ba prosesu administrasaun no eleitorál iha Fohoren.



Pontu Fokal Portal Munisipal Munisipiu Covalima


© 2026 Covalima Municipal Authority