MAUDEMO, 17 Novembru 2026 – Xefe Suku Maudemo hamutuk ho membru Konsellu Suku no komunidade sira iha Suku Maudemo, Postu Administrativu Tilomar, Munisípiu Covalima, partisipa ativu iha atividade sensibilizasaun kona-ba Lei Kontrabandu Ema ne’ebé hala’o iha loron Tersa ne’e (17/11/2026).

Atividade importante ida-ne’e fasilita diretamente husi Sra. Sandra, espesialista husi Austrália, ne’ebé fahe matéria kle’an kona-ba kuadru legál, kauza, no impaktu negativu sira husi krime kontrabandu ema nian, liuliu ba komunidade sira ne’ebé hela iha área fronteira.

Sensibilizasaun ne’e hetan partisipasaun másima no apoiu maka’as husi entidade seguransa no autoridade oioin, inklui ekipa husi Polísia Sientífika Investigasaun Kriminál (PCIC) Nasionál, Unidade ba Ema Vulnerável (VPU), Unidade Patrollamentu Fronteira (UPF), no Falintil-Forsa Defeza Timor-Leste (F-FDTL).

Marka prezensa mós iha eventu ne’e Komandante PNTL Munisípiu Covalima ho nia ekipa, Komandante Eskuadra PNTL Postu Administrativu Tilomar ho nia ekipa, Administradór Postu Administrativu Tilomar ho nia ekipa, inklui Asosiasaun Suporte PNTL (ASPNTL) Postu Administrativu Tilomar.

Objetivu prinsipál husi programa sensibilizasaun ne’e mak atu hasa’e koñesimentu no konsiénsia komunidade nian hodi prevene no kombate krime transnasionál hanesan kontrabandu ema, nune’e mós atu hametin liután kooperasaun entre komunidade lokál ho forsa seguransa sira iha fronteira.

Atividade ne’e la’o ho susesu no hetan antuziasmu boot husi partisipante sira, ne’ebé hatudu kompromisu hodi servisu hamutuk hodi proteje komunidade husi kualkér forma esplorasaun no krime organizadu.




Pontu Fokal Portal Munisipal Munisipiu Covalima


© 2026 Covalima Municipal Authority