SALELE, COVALIMA (04 Agostu 2026) — Administradór Postu Administrativu Tilomar hamutuk ho Komandante Eskuadra Polísia Nasionál Timor-Leste (PNTL) Tilomar, komandante Unidade Patrulhamento Fronteira (UPF), parseiru F-FDTL, Lideransa Relijioza (Amu-lulik no Madre sira), ho Xefe Suku sira husi Suku 4 (Lalawa, Beiseuk, Kasabauk, no Maudemo) ofisialmente loke jogu komunitáriu iha Kampu Futebol Salele, Tilomar. Jogu ne’e realiza hodi komemora Loron Konsulta Populár ne’ebé sei monu iha dia 30 Agostu 2026.
Iha biban ne’e, joventude husi Postu Administrativu Tilomar fó apresiasu no agradesimentu kle’an ba Administradór Postu. Sira manifesta katak iha nia mandatu tinan rua (2) nia laran, joventude sira iha Tilomar sente metin liután unidade no amizade ne’ebé forte, tanba susesu hodi mantein ambiente hakmatek no nunka hamosu konflitu iha fatin-fatin. Joven sira haksolok ho planu estratéjiku Administradór nian ne’ebé nafatin halibur joventude no komunidade sira hodi fó liman ba malu, servisu hamutuk, no kria paz no estabilidade nudar responsabilidade Tilomar-oan nian.
Iha sorin seluk, Administradór Postu Administrativu Tilomar salienta no fó biban ba joven sira atu labele haree ba ras, kór polítika, ka diferensa ideolojia. Nia haktuir katak asuntu sira ne’e hotu sei la’o tuir nia tempu, maibé fo obrigatóriu ba Tilomar-oan hotu atu hamutuk hodi hadi’a rai Postu Tilomar ba futuru ne’ebé nabilan.
Iha nia liafuan ikus, Exmo. Administradór Postu apela ba jogadór no juventude sira hotu katak jogu ne’e realiza la’ós de’it atu manán troféu, maibé ho objetivu boot atu kria amizade, hametin unidade, haburas domin, no hakribi violénsia ka konflitu entre joven sira. Nia haktuir katak joven sira mak nudar “masin ne’ebé fó midar” ba ema hotu-hotu, tan ne’e joven Tilomar tenke hamutuk ksolok hodi kaer liman hodi hadi’a postu, suku, no aldeia ba oin.
Pontu Fokal Portal Munisipal Munisipiu Covalima