COVALIMA — Iha loron 6 Jullu 2026, Autoridade Munisípiu Covalima realiza serimónia isar bandeira ba primeiru semana fulan Jullu, ne’ebé prezide hosi Prezidente Autoridade Munisípiu Covalima Sr. Miguel Armada Cardoso, akompaña hosi Sekretáriu Munisipal Administrasaún Finansas, Sr. Alberto Moniz de Araújo no Komandante Komandu PNTL Munisípiu Covalima Superintendente Xefe Polisia Sr. Paulino Carmo Perreira,. Serimónia ne’e hetan partisipasaun másima hosi Diretor/a Servisu Munisipál, Diretor/a Delegasaun Territóriál, Xefe Departamentu, Xefe Seksaun, hamutuk ho funsionáriu sira hotu.
Diskursu hosi Prezidente Autoridade Munisípiu Covalima “ husu ba Komandante Komandu PNTL Munisípiu Covalima atu halo jestaun ida furak liu tan, liu-liu iha fronteira mota masin hodi labale mosu tan problema hirak mak akontese iha fulan Juñu nia laran no mos ba sidadaun sira persija kuidadu no hadomi ita nia a’an, hatudu konsensia hodi iha hanoin diak ba rai RDTL espesifiku rai Covalima.
alende ida ne’e, Prezidente Autoridade mos fó sai preokupasaun kona-ba situasaun inundasaun ne’ebé akontese iha fatin balu, hanesan iha Akar-Laran, Beco, no área sira seluk. Kona-ba asuntu ne’e, Prezidente husu firmemente ba Sekretáriu na’in tolu, Diretór Servisu Munisipál, Delegasaun Territóriál, Xefe Departamentu sira, to’o funsionáriu públiku hotu-hotu, atu mantén nafatin kooperasaun, serbisu hamutuk, no hatudu pontualidade ne’ebé aas iha kualkér knar no responsabilidade, nune’e bele lori Munisípiu Covalima ba oin.
Alénde ne’e, Prezidente mós hato’o vizaun foun katak Edifísiu Autoridade Munisípiu Covalima nian sei muda hosi fatin agora ba fatin foun. Tan ne’e, nia husu mós ba parte Diresaun Servisu Munisipál Obras Públikas (SMOP) atu serbisu ho kbiit tomak, nune’e Covalima bele transformadu sai sidade foun iha tinan oin (2027). Iha lia-makfikit, PAM apela ba estrutura tomak atu nafatin hamutuk hatudu pontualidade no profisionalidade hodi hamriik firme ba mudansa Covalima nian.
Pontu Vokal Portal Munisipal Munisipiu Covalima